「別人成功，好好替別人高興。別人失意，好好鼓勵一下。」- On C AllStar
近呢幾年嘅社會風氣，令到好多演藝界或幕前工作嘅人都好沉默。尤其喺社交網絡嘅世界，每行一步，每講一句說話都變得愈來愈審慎。我喺呢一行工作大大話話都有十幾年，唔稱得上係大紅大紫，但慶幸尚有機會俾自己把握。
林海峰有首歌係咁講「努力奮鬥加油，加油努力奮鬥，同路某某互勉握手。就跌低遞隻手，盡耗的能量再有一起奮鬥」。每一位喺工作上成功嘅人，背後花多少氣力，遇上幾多挫折，只係無話俾大家知。鬥長命、鬥堅持，彷彿係我嘅座右銘，因為人生就如馬拉松，未跑到去終點都唔知結果係點。
有時候見到身邊嘅朋友有工作，我會為佢哋而高興！最好就梗係百花齊放，客有錢有Budget齊齊有工開。千祈唔好用負面嘅心態，去否定別人嘅努力，例如「佢平價搶你Job」、「佢同個客好Friend」、「佢係人肉廣告牌好Cheap」、「佢乜Job都接好濫」。每一個人都有佢嘅價值同定位，機會同際遇我哋永遠控制唔到，唔代表你免費出Quote就一定中Job。我哋唯一能夠做嘅就係自己努力嘅同時，亦為身邊嘅同行打氣，咁樣先會有一個良性又健康嘅競爭。
比你優秀嘅人大有人在，努力令自己變得更強，先係獨一無二嘅優勢，大家加油呀！
Search